A squadra di i cunsiglieri pedagogichi in lingua è cultura corsa hà u piacè di fà ci scopre u primu episodiu di u podcast “À FIOR’ DI LINGUA”. Issu prugettu ambiziosu si prupone di mette in valore a ricchezza di a lingua è di fà la campà cù parechje testimunianze di classe.
Più ch’un podcast, “À FIOR’ DI LINGUA” hè un omagiu. Hè una chjama à a scuperta, à l’amparera è à a bellezza di a lingua. Ispiratu da i “tragulini”, ‘ssi mercanti itineranti chì giravanu i paesi, ‘ssu prugrama ci porta à l’indrentu di e scole di Corsica, à u riscontru d’insignenti è di zitelli appassiunanti.
Què sò voce muntagnole
Pè ‘ssi primi episodi, partenu à a scuperta di i prugetti pedagogichi chì fiuriscenu in e classe di l’isula. Prugetti chì sbuccianu è si spannanu in lingua corsa. Prufessori è sculari, guardiani di a tradizione urale, spartenu à u microfonu i so scopi, e so sfide ma soprattuttu e so realisazione. Incuragiscenu i so sculari à sprime si cù ‘ssa lingua à tempu vicina è landana.
Una lingua passiunante è cuntradittoria
A lingua corsa ùn hè micca chè un mezu di cumunicazione. Hè dinò l’inseme d’una storia, d’una cultura, d’una terra è di modu più generale, d’una manera d’esse à u mondu. Hè una leia prufonda incù e radiche di l’isula è quelle di a so ghjente. Ma pò esse dinò u spechju di e nostre cuntradizione, di a nostra paura di sbiaglià ci, di dì l’affari di traversu, di fà si rimpruverà o di sente u famosu « ùn si dice micca cusì » !
“À FIOR’ DI LINGUA” in quantu chì prugramma educativu ci ramenta chì i sbagli facenu parte di u prucessu d’amparera è ch’elli ci danu dinù l’occasione di cresce inseme.
Dispunibbule in quattr’è trè sette !
U scopu di stu podcast hè di purtà fora ‘sse testimunianze di classe in lingua corsa. Eccu perchè u puderete ritruvà nant’à tutte e piattaforme di spartera audio è videò : YouTube, Spotify, Deezer o Apple Podcasts.
Promouvoir des démarches pédagogiques actives, à travers des situations motivantes qui placent les élèves au cœur des apprentissages, pour favoriser leurs prises de paroles en langue corse et contribuer au développement de leurs compétences langagières.
Ritruvate quì sottu u primu episodiu.
