I liceani di a siconda bislingua di u liceu Letizia d’Aiacciu ani participatu à un scambiu culturali è linguisticu cù i so pari di u liceu Pàlcam di Barcilona, par via di u prugramma Erasmus+ è di a piattaforma Etwinning.
Sò i catalani chì si sò mossi i primi pà un sughjornu aiaccinu da u 14 à u 20 d’aprili, pò l’aiaccini ani francatu u mari anch’eddi pà andà in Barcilona da u 10 à u 16 di maghju di u 2024.
A visita di sti dui rughjoni di u miditarraniu hà parmissu di scopra l’identità culturali di i dui lochi è di fà massi paragoni, ch’edda sighi à liveddu linguisticu, ambientali, istituziunali, culturali, architetturali, storicu o ancu à liveddu di a gastrunumia. Parechji atteddi sò stati messi in anda è i liceani ani dinò participatu à un emissioni di radio in direttu.
Un prughjettu chì hà parmissu di fà di a lingua corsa è di u bislinguisimu un scalinu versu u plurilinguisimu è l’apartura à l’intarnaziunali.
